٢١\١٢\٢٠١١

یەکگرتوو یان فێگرتوو؟

هیوا ره‌ش      

لە منداڵدانى گەندەڵیى دەسەڵاتدارێتى بیست ساڵەى خۆماڵیى کوردیدا و دواى کوردکوژییەکى بێهاوتا لە پێناو دەسبەسەردا گرتنى میراتیى خەڵک و بێبەشکردنى ڕۆڵەکانى گەلەکەمان لە ژیانێکى ئارام و ئاسودە ، بێهودەییى و هیچگەرایى بووە مڵۆزمى خۆسەپێن بەسەر ئاواتە وەدینەهاتووەکانمان و توێژێکى فراوانى لاوانمان و زۆرێک لە خانەوادەکان ڕووگیرى قاتوقڕى و گرانى و ناسەقامگیریى بونەوە و بۆ دەربازبون لێى خۆیان دەدایە بەر ڕەشەباى قەدەرى قرشەکانى دەریاى ئیجە و مینڕێژیى سنورەکان و سوکایەتى جەندرمە و پاسدارانەوە ، زۆرێکیش بێکارى و بێنانى پاڵى پێوەنان پەناوەبەر هەندێک دیاردەى نامۆ و نەشیاو ببەن و بەو سۆنگەیەوە دوچارى سزاى مەرگ و زیندانى و پەڕاگەندەیى ببنەوە ، دەسەڵاتدارێتى کوردى دواى ساڵەهایەک لە نەهامەتى و کوشتار ، زەمینەیەکى لەبارى ڕەخساند بۆ لەدایکبونى گروپگەلێکى توندڕەوى سەلەفیى ئیسلامیى ، چونکە تەواوى ماف و ئازادییەکانى خەڵک و بنەما دیموکراسییەکانیان خستبووە ئۆغرى ویستى تەسکى حیزبایەتییەوە و تەنانەت لە پێناوى سەپاندنى دەسەڵاتى دیکتاتۆریانەى حیزبدا خاک و خەڵک و سامانى وڵات و حکومەت و پەرلەمانیشیان لەت کرد و تەواوى حیزبەکانیشیان بە نەتەوەیى و عیلمانى (چەپ و دیموکرات) ەوە بەسەر بەرەدژەکانى خۆیاندا بەشاندەوە و لق و پۆیان بڕین و تەرەفگیر و بێهەڵوێستیان کردن و لە هەموو بەها نەتەوەیى و نیشتمانییەکان دایانماڵین و کردیانن بە پاشکۆیەکى یەخسیرى ویست و گوتارى ئاگرینى شەڕخوازییان ، دەسەڵاتى حیزبگەرایى ناشەرعیى ڕۆڵى تروکێنەر (مفقس)ى بینى لە هەڵهێنانى گەراى هەناردەکراو و بەخێوکردنیان ، هەندێک لەو گەرایانە کوڵەوەیبابیان لێدەرچوو ، جوندولئیسلام و ئەنسارولئیسلام و تێکەڵەیەک لە تیرۆریستانیان لێ وەبەرهات و دواى ساتەوەختى سڕى و متبوون کاژیان فڕێدا و کەوتنە قۆناغى فیشکاندن بۆ خەساندنى خواستە ڕەواکانى گەلەکەمان و لەباربردنى خەونى چەند ساڵەمان بۆ خستنە خزمەتى داگیرکارانى کوردستان ، تەنانەت مەترسییەکان گەییشتنە ڕادەیەک بە دەیان وەچەى بنلادن و زەرقاوى لە هەرێمەکەماندا چوکەرەیان کرد بە ئاراستەى بنیاتنانى ئەمارەتى خوێن و ئەنفال تیرۆر و تۆقاندنیان کردە میوانى ناوەختى ماڵەکانمان ، هەر لەو کەشە بۆگەناوییەى حیزبسالارییەدا کە جگە لە قوڕبەسەریى شتێکیتر لە هەگبەیدا نەبوو ، بارى سەختى بژێوى ، گرانى ، بێکارى ، بێهیوایى و بێهودەیى کەڵەکە ببون ، بۆ بەرگرتن لە تاڵاو نۆشین ئەوەى ملى غوربەتى گرتەبەر ڕۆییشت و بەرەو مەرگ و ژیانى کولەمەرگى ملى نا ، ئەوانى دى بونە خۆراکى ئارەزووى شەڕانگێزیى قەلوداڵە سیاسییەکانى حیزبە باڵادەستەکان و شاگرد و دەسوپێوەندە گەندەخۆرەکانیان ، ئەمانە دوچارى نامۆیى (اغتراب) هاتن لە نێو خەڵک و خاکى خۆیاندا ، کە گەلێک لە نامۆیى لە نێو خەڵک و خاکى بێگانەدا ئەستەمتر بوو ، غەمۆکى و نامۆیى لاوانى وڵاتیان پڕکێش کردبوو ، غەمى جگەرگۆشەکان غەمى خاکى خستە تورەکەى بیرچوونەوە ، ماڵفرۆشیى و ڕەنجفرۆشیى و ... بەرامبەر پارەیەکى کەم بۆ مەیسەر کردنى نانى چەند ژەمێک دادى کەسى نەدەدا ، بۆیە تاوانى گەورەى کۆمەڵایەتیش پاشبەندیى ئەو دۆخە نەخوازراو و بێزراوەى دەسەڵاتدارانى کوردستان بوون ، کۆمەڵگا لە تەواوى هێزە سیاسییەکان نائومێد ببوون ، چونکە هەمویان سەرقاڵى کەسابەتى حیزبى و دزینى بژێوى خەڵک و بەتاڵانبردنى داهاتى نیشتمان بوون ، لەو دۆخە پڕکێشمەکێشى چارەنوس نادیارەدا (یەکگرتووى ئیسلامیى کوردستان) لە بەرگى فریادڕەسێکدا بە ڕژدى دەرکەوت.

لەگەڵ سەرهەڵدانى یەکگرتوودا وەکو هێزێکى ئیسلامیى میانڕەوى پڕدەسودیاریى بە پەیامێکى مەدەنیانەوە ، سەرەتاى لێژبونى گڵۆڵەى حیزبە ( چەپ و عیلمانى ) یە پاشکۆکانى دەسەڵات دەستى پێکرد و ڕۆژ لە دواى ڕۆژ سوک و بچوک دەبونەوە و متمانەیان دەدۆڕاند ، هاوکێشەى سیاسیى بە ویستى ئاشگێڕان باراشى لە ئاشێ نەدەکرد ، لە بەرامبەردا پێگەى یەکگرتوو لە بە هاناوەچوونى مەرجدارى لێقەوماوان تا دەهات فراوانتر دەبۆوە ، لەپاڵ ئەمەشدا پێڕەویى سیاسەتى عەقڵانیى جودا لە باڵە ئیسلامییە سەلەفییەکانى پێش خۆى بووە جێگەى ڕامانى دەوروبەرەکەى و بەو هۆیەوە تا هێدیهێدى پەرەیان دەستاند ، لە هەمان کاتدا زۆرجاران هاوشان هەڵوێستێکى نەتەوەییانەیان پیادە دەکرد و بانگى ئیخوانچێتییان لە ساتەوەختى وەرچەرخانى پێویستدا وەلا دەنا و دەتوانم بڵێم لە هەندێک کاتدا بە تایبەتى لە پەرلەمانى بەغادا هەڵوێستى چاوەڕواننەکراوى بەهادارتریان لە تەواوى هێزە خۆبەنیشتمان و نەتەوەپەروەرزانەکانیتر بە مکوڕییەوە نواندووە و هەر فشارێکیشیان لەسەر کرابێ لەو هەڵوێستە مەردانانەى خۆیان ژیوان نەبونەتەوە و بە هەموو هەڵە و کەموکوڕییەکانەوە پشتیان لە لیستى کورد لە ناو پەرلەمانى عێراقدا نەکردووە و بە دوو پێوەرى جیا مامەڵەیان لەگەڵ بارودۆخى هەرێم و بەغادا کردووە و پێکیانەوە نەبەستۆتەوە ، بە سیاسەتى ساغڵەمى دوور لە چەکدارى و زەبروزەنگ لەگەڵ کۆمەکى ماڵى و دارایى زۆروزەوەندیان کاریان بۆ ئەوە دەکرد بکەونە کێبڕکێى وەدەسهێنانى جڵەوى دەسەڵات و لە سەرانسەرى کوردستاندا بوونە هێزێکى کاراى سیاسیى مەیدانى و لە هاوکێشەى سیاسیشدا ژمارەیەکى بەهێزیان لە پرۆسەکانى دەنگداندا بەدوور لە پێشێلکارى ، ساختەکاری و ویژدانکڕین بۆ خۆیان مسۆگەر کرد ، گومانى سەرچاوەى دارایى و داهات و خەزنەیان لەولاوە بوەستێ ! بەڵام سیاسەتى لۆژیکیانەى خۆشیان یارمەتیدەریان بوو لە تەشەنە سەندنیاندا و پەندیان لە سیاسەتى تیرۆریزمانەى گروپە توندڕۆ ئیسلامییەکانى دیکە وەرگرت کە لە ئاکامى سیاسەتى تۆقاندن پاشەکشەى بەرچاویان لە خۆیانەوە پێچا و زیانى گەورەیان بەرکەوت ، هەرچەندە سەرەڕۆییەکانى سەدام حوسێن و هاتنى سوپاى نێودەوڵەتیى و ئامریکا بۆ ناوچەکە ڕۆڵى بنچینەیى گێڕا لە ڕیشەکێش کردنیان ، دەنا بەو ساناییە لەناو نەدەچوون و تەماعى ئەمیر و خەلیفەکان لە دەڤەرى هەورامانەوە چاوى بڕیبووە دوبارە ( غزو ) کردنەوەى سەراپاى کوردستان و گێڕانەوەى حوکمى شیر و تیر .

دواى گۆڕانکارییەکان و سەرکەوتنى باڵە ئیسلامییەکانى تونس و میسر و مەغریب و چاوەڕوانیى سەرکەوتنى زیاترى شوێنانى تر دەبوو یەکگرتوویان هان بدایە شێنەییتر بەرەو سنوقەکانى دەنگدان ئامادەکارى بکات ، نەک کۆپیکردنى (بەهار) ى عەرەبى و هەوڵى باڵادەستیى ئەردۆگانى بەرماوەى ئیمپراتۆریەتى پیاوە نەخۆشەکە لە کۆنترۆڵ کردنى بەهارەکان بایى و بوغرایانى نەکردبا ، بێپەلە و بە کاوەخۆ لەسەر هەمان ڕیتم و هەناسەى کارى ساڵانى ڕابردووى بەردەوام بوایە و هەڵپەى نەکردبا ، موسڵمانان دەڵێن : (شەیتان پەلەى کرد چاوى خۆى کوێر کرد - العجلە من الشیتان) ، نەک لەسەر وشەى - جێندەر - فرەگەرمتر بێنە دەنگ و لە قەڵەمڕەویى سوپاى هاوبیرانى ئیسلامیى ئێران و تورکیایان بۆ ناو قوڵایى خاکى کوردستان هەڵوێستى نوزاوى دەرببڕن یان قڕوقەپ متەقیان لێوە نەیات ، ناڕازێتییان لە وەدەنگهاتنى دانانى قایمقامێکى هاواریى ، دروشمە بریقەدارەکانى یەکسانى و مافى مرۆڤ و ئازادى و پێکەوەییانى نەخستایەتە ژێر پرسیارەوە ! هەروەکو چۆن لە ڕوداوەکانى ئەم دواییەى دەڤەرى بادینان بە کوڵ فرمێسکى بارەگا سوتانیان ڕشت بەڵام ئامادە نەبوون بۆ داکۆکى لە ماف و ئازادییەکانى خەڵکى نائیسلام و پەلاماردانى سەرچاوەى بژێوى و موڵک و ماڵیان لە لایەن هەندێک لاوى سەرەڕۆى ئیسلامیى تینوو بە خنکاندنى ئازادى بێنە گۆ ! تەنانەت سەرکردایەتى یەکگرتو تاڵەمویەکى بەرسمێڵیشیانى پێنەبزوا ، بۆیە شتى گەورە هەبوون کاریان لەسەر بکردایە بۆ گەییشتن بە پەیامى شاراوەیان نەک بۆ شتە لاوەکییەکان شوناسى خۆیان لە تاریکییەوە بخەنە بەر ڕوناکى .

یەکئامانجیى و یەکستراتیژیى ، کرۆکى بەرنامەى قورئانیى ئاییندەى تەواوى گروپە ئیسلامییە میانڕۆ و توندڕۆکانە ، بەڵام لە تاکتیکدا جیاوازییان تێدا دەبینرێت ، میانڕۆکان - یەکگرتوو - بە نمونە ، کە دیارترین گروپى ئیسلامیى کوردستانە تا ئێستا دانى بەخۆدا گرتبوو بۆ کارکردن لە پەنادا لە پێناوى هێنانە کایەى دەوڵەتى خەلافەتى سەدان ساڵ بەسەرچووى ئیسلامیدا ، تاکتیکى کارنامەکەى چیتر بڕى نەکرد و نەیتوانى ئۆقرە بگرێ تا نزیک دەبنەوە لە بەندەرى ئامانجەکانیان ، ئیسلامییەکان بەر لەوەى مەساجى فکرى خۆیان بکەن و دەمارى گرژیان خاو بکەنەوە ، فێ گرتیانى و گڕیان لە بنکەکانى مەساج بەردا ، هەر لەم میانەیەشدا - شەلم کوێرم ، کەس نابوێرم - ڕاگەیاندن و کادیرە حیزبى و حکومییەکانیشیان بەلەسە بوون و بە ڕاست و چەپدا بەربونە وێزەى چاک و خراپ ، سپى و ڕەشى دەوروبەریان بە ئومێدى داکردنى لێزمەى (بەهار)ى کۆنەپەرستانەى هاوگروپەکانیان لە وڵاتانى عەرەبى و کۆپى کردنى لە کوردستاندا ، چش لەوەى دواڕۆژى گەلەکەمان لە کوێ لەنگەر دەگرێ؟!

مارکس دەڵێَ : (مرۆڤ بەنرخترین سەرمایەیە) ، بێگومان بەدەر لە ئاین و ڕەگەز و نەتەوە و بێجیاوازى ، لێ ئیسلامییەکان بێبۆنە پەلامارى دەدەن ، ئەمەش نامۆ نیە چونکە پێچەوانەى بیروبۆچونى ئەوانە و ئەوان بڕوایان بە ملپەڕاندنى مرۆڤ و هەتک کردنى جەستە و بە کۆیلەکردنیەتى ، مارکس بڕواى بە یەکسانیى تەواوى ئینسانەکانە بە ڕەش و سپى و نێر و مێوە ، لێ ئیسلامییەکان کۆیلەیى و کەنیزەکیى لە هەمبانەیاندایە ، مارکس ژیانى خۆى تەرخان کرد بۆ داڕشتنى فەلسەفەى ئابوریى سۆشیالیزم و دادپەروەریى کۆمەڵایەتى بۆ کۆمەڵگاى مرۆڤایەتى ، لێ مێژووى ئیسلام بە تەرزى دوڕگەى عەرەبى ، باج و خەراج بەسەر هەموو ئەوانەدا دەسەپێنێ کە لەگەڵیاندا وێک نایەتەوە ، ئەگەر مارکسییەکان لە ئاستى متمانەى جەماوەردا نەبن ، ئەوسا دەبێت لە ئامادەباشیى جیهادى ئیسلامییەکاندا بین تا ببینە میوانێکى پەڕ و باڵ کراوى دیوەخانى غەنیمەتەکانیان .

پێم وایە دەکرێت هەنوکە برادەرانى یەکگرتووى ئیسلامیى لە هەموو ساتەوەختەکاندا - لا اکراە فی الدین -ەوە دەست پێبکەن نەبنە باڵۆن بە ئاسمانى شۆفینیزمى ئیسلامى عەرەبى و ملکەچى وتەى پڕ لە واتاى مرۆڤایەتى لینین ببن و بڕوا بهێنن کە دەبێت (بەر لەوەى یەخەى یەکتر دادڕین لە پێناوى بەهەشتێکدا کە کەسمان نەماندیوە ، دەست لە نێو دەستى یەکتر بکەین لە پێناوى بنیاتنانى بەهەشتێک لێرەدا)، تۆ بڵێى ئەم وتەیە لەنگییەکى تێدا بێت و باشتر نەبێت لە ئیعلانى جیهاد دژى یەکتر ؟ دەبا هەموو (کفاح و جهاد) بکەین دژ بە کەمینەى کەمى سەرمایەدارە دزەکان بۆ فەراهەم کردنى خۆشگوزەرانیى بۆ زۆرینەى خەڵکى بەشمەینەتى گەلەکەمان ، لە دواییدا کام ئایدیۆلۆژیا لە خزمەتى زیاترى کۆمەڵگادا بوو ئەویان بکەین بە بەرنامە و ڕێبازمان ، ئەگەر نیاز و مەبەستمان پاکە بۆ گێڕانەوەى بەهارى دزراومان بۆ ناوماڵى نیشتمان ، دەبا ئیتر بەس بێت درۆ کردن لەگەڵ خود و خیانەت لە مرۆڤایەتیى.

ماڵپه‌ڕی هیوا ره‌ش