٣٠\۴\٢٠١٠

یەکگرتووى ئیسلامى گەورەتر مەکەن!

بەشدار عه‌لی  

ئەگەر مامەڵەى پارتى و یەکێتى نەبوایە،خەڵکى کوردستان هەرگیز ئاشنایەتى لەگەڵ ئەو حیزبە ئیسلامیانە نەدەبوو،ئەگەر برسیەتى و نەبونى و شەڕ و کوشتار و ناعەداڵەتى پارتى و یەکێتى نەبوایە،ئیستا ئیسلامیەکانیش نەدەبونە ئەو هێزە کە هەرەشە لەهەموو تازەگەرییەک بکەن.ئەوە دەسەڵاتى سیاسى بوو لەبەر بەرژەوەندى و راگرتنى هاوسه‌نگیی سیاسى هاوکارى و پشتتگیرییان کردن و چاویان لە تیرۆر و کارە تێکدەرەییەکانیان نوقاند و فەرشى سوریان بۆ راخستن و لە هەموو ئیمکانیاتێک بەهرەمەندیان کردن،هەر هەفتەى رابردوو بەهۆى فشارى حیزبە ئیسلامیەکان گۆڤارى (خەڵک)یان داخست.

قسەکردنێکى زۆرى میدیاى پارتى ئەم رۆژانە زوومەکانیان روو لە یەکگرتووى ئیسلامیە،بەڵام بە قازانجیان تەواو دەبێت و فرسەت وەردەگرن بۆکوتانەوەى هەموو بەها ئەخلاقى و مرۆڤایەتیەکانى کۆمەڵگا کە لەگەڵ بیرکردنەوەى ئەوان ناکۆکە.

پێویستى بە فەلسەفە و مێژوو و لێکۆڵینەوە و بەدواداچون نیە تا لە راستیەکان تێبگەین،کاتێک کە دەسەڵاتیان رەها بوو،سەدان مرۆڤیان تەنها لەسەر ووتنى ووشەى ماف و ئازادى و یەکسانى، سەریان لەلاشە جیاکردەنەوە و مەحکومیان کردن بە مەرگ،نوسەران و رۆشنبیران نەیانتوانى لەبەر فتواى ئیسلامیەکان بۆچونەکان لەسەر قێزەوەنترین دیاردە دەرببڕن،تێزابیان کرد بە قاچى و ئەو کچانەى جلى مەدەنیان پۆشى و خەڵکیان لەدژیان هاندا،تا ئیستاش کادیران و لایەنگرانیان لە مینبەرى مزگەوتەکاندا هەرەشە دەکەن و خوێنى ئەو خەڵکانە حەڵاک دەکەن کە وەکو ئەوان بیرناکەنەوە،خراپى گوزەرانى خەڵکیان بە فرسەت زانى و پێدانى چەند کیلۆیەک ئارد و برنج و پێدانى چەند پۆلێکى وەرگیراو لە وڵاتانى ئیسلامى و کەنداویان کردە مەرجى لە چادر هەڵکێشانى کچان و مناڵان و راکێشانیان بۆ نێو حوجرەکانیان و شۆرینەوەى مێشکیان بە خورافیات،مزگەوتەکانیان کردە شوێنى سرینەوە و پلان دانان بۆ ئەو دەنگ و رەنگانەى لە خۆیان جیاوازن،بەرگریان لە بۆگەندەرترین سیستەمى پەروەردە و فێرکردن کرد بۆ بەرهەم هێنانى نەوەیەکى یەخسیر و گوێرایەڵ و بێ بیرکردنەوە،لە هەوڵدان بۆ هێشتنەوەى یاساو دەستورێک کە بە ئاشکرا شەرعیەت دەدا بە پلەدوویى و ژێردەستەى ئافرەتان،..هەموو ئەمانەش بە ئیجازە و لەژێر چاودێرە دەسەڵاتى سیاسى و پارتى و یەکێتى ئەنجامدران.

وێرانى وەزعیەتەکە لێرەوەیە،حیزبێکى ئیسلامى وەکو یەکگرتوو کە هەموو بەرنامە و پرۆگرامەکانیان لە ئەلفەوە تاکو یائى ناکۆکە لەگەڵ سەرەتاترین ماف و ئازادییەکانى تاک و بەهرەمەند بوون لە ژیانێکى بەختەوەر بۆ بەشەرەکان، هەمیشەکار لەسەر دورست کردنى جیاوازى و مانەوى هەژارى و برسیەتى و تیرۆر و تۆقاندن و تەقاندنەوە و مل پەڕاندن و ناکۆکى سەرگەردانى خەڵک دەدەن،کەچى ئیستا و وەکو فریادڕەس خۆیان دەناسێنن و باسى مافى و ئازادى دەکەن !!!
دابینکردنى خزمەتگوزارییەکان و فەراهەمبونى ژیانێکى نۆرماڵ بۆ تاکەکان،کۆتایهێنان بە بێکارى و نەبونى و شەڕ و ئاژاوە و ناشەفافى و دابەشکردنى سەروەت و سامان بە یەکسانى،رزگاربوون لە سەرگەردانى و پێکهێنانى دەوڵەتێکى مەدەنى بۆ خەڵکى کوردستان،دەتوانێ زۆرێک لەهێزى نەخوازراو لە گۆرەپانى کوردستان کاڵ بکاتەوە،هەر ئەمەش رێگاى کارساز نەک هێرش و پەلاماردانى ناڕەوا و دورستکردنى ژینگەى ترس و تۆقاندن.چونکە ئەم وەزعیەتە بە قازانجى ئەوان تەواو دەبێت.
 

ماڵپه‌ڕی به‌شدار عه‌لی