٢٦\١\٢٠١٥

زۆر گەڕام تا پەیدام کرد!

دارا خونچە     

زۆر گەڕام تا پەیدام کرد، زۆر کۆشام تا دەستبەرداری بووم!

ئەوەی سەرێ قسەی ئەو پێرەمێردە گوڵفرۆشە رووخۆش و جوان و گەشە بوو کە وەهام هەست دەکرد گوڵەکانی رەنگ و خەسڵەتی ئەویان گرتیە نەک وە پێچەوانەوە! جار جارە دەچوومە گوڵفرۆشییەکەی و چەپکە گوڵەکم لێ دەکرێ، هەر جارەک کە دەمدیت ئەو قسەیەی چەندبارە دەکردەوە، سەرم لێی سوڕمابوو و نەمدەزانی مەبەستی چیە! پرسیارم لێ دەکرد، کەچی وە زەردەخەنەیەکی جوان و ناسکەوە تەنێ قسەکەی دووبارە دەکردەوە و ئیدی بابەتەکەی دەگۆڕی، تا رۆژەک مێواندارییەکی پڕ وە دڵی خۆیم لۆ سازدا و وە هەر جۆرەک هەبوو رازییم کرد تا ئەو قسەیەی شی بکاتەوە و سەربردەی دروستبوونەکەیشیم وە درێژیی لۆ بگێڕتەوە، پاش ئەوەی هەناسەیەکی دوور و درێژی هەڵکێشا و وەک گوڕیە ئاورەک بەریهەڵدا.. گۆتی:

[دەشێ و دەکرێ لێروکانە لە هزران رابچم و لەباتی ئەو کیژەش بیربکەمەوە کە لە نێومدا روونشتیە.. ئەو کیژە تا تێر تێر مەمکانی نەمژم و سەرتاپای جەستەی نەلێسمەوە هەرگیز ئەو برینانەی ساڕێژ نابن کە دای و باب و نێرەوزان لەسەر جەستە و دەروونیدا چێیان کردیە!

ئا ئەمن هەم و هەر کەسە رووکەشەکەشم بوونە راستەقینەکەمە! چونکێ کۆمەڵ لە باشترین باری تا نهۆیدا هەر ئەمنی دەرێ دەناسی و ناچاریشم دەکا کەسەکەی ناخم دابپلۆسم تا رەدووم بکەوی و وە هەردووکمان خاوەن ئەو دەنگە بین کە هەمان ئاستی دەنگی هەر تاکەک یان دروستتر بێژم هەر (گا)یەکی نێو گاڕانەکەی هەیە و پاشانیش تێکڕای دەنگەکان یان دروستتر بێژم تێکڕای بۆڕەبۆڕەکان لە قەشمەریی نوقم بکرێن!

با ئەوە هەر لە نێوانی خۆماندا بی؛ زۆر جار وە دزییەوە گێ لەو کیژەی ناخم رادەگرم و هێندەک جار وە قسەشی دەکەم.. هەر وە دزییشەوە دەخزێینە نێو باوەشی یەکودوو و تا کلوکۆی خۆمان دانەڕێژین دەستبەردار نابین! هیچ ناجۆر نییە ئەمنی کەسایەتیی هندوڕم مێ بم و ئەمنی کەسایەتیی دەرێشم نێر بم و هەروا بێتەوە پیاوەتییشم یەک دنک جوایەز نەبی دەگەڵ ئی پیاوی کتومت پیاو! چونکێ بخوازم یان نەخوازم کەسایەتیی خۆسەپێنەرانەی دەرێ دەگەڵ زاڵیی پیاوانەییم دەگونجێ، لێ ئەمن حەزم بەوە نەدەکرد.. دواییش لەوە دەترسام ژنەک ببتە هاوسەرم و ئەویش ژنەک لە ناخیدا هەبی؟! ئەو کاتە دەبوونە سێ ژن و هەرگیز بەرگەیانم نەدەگرت - ژنی ناخی خۆم و هاوسەرم و ژنی ناخی ویش -! لە لای خۆمەوە بڕیارم دا دەبی کیژەک بخوازم ژن لە ناخیدا نەبی.. هەر دەگەڕام و هەر دەگەڕام لێ هەر پەیدا نەدەبوو...

هاوڕێیەکی دڵسۆز و قسەخۆشم هەبوو، وەک من کێشەی هەڵبژاردنی ژنی هەبوو.. لێ ئەو پێچەوانەی من پیاوەک لە هندوڕیدا هەبوو، لەبەرئەوە خۆزیی وە من دەخواست.. هەر لەو بارانەوە رۆژەک فەرمووی:

ئەو پیاوەی وەک تووە.. فرە تەڕوبڕ و بێ ئاریشە و پڕ لە ئاسوودەیی دەژی، لێ ئەو پیاوەی کەسەکەی ناخیشی هەر پیاوە.. فرە هیشکوبرینگ و خەمبار و پڕ لە دردەسەریی دەژی، کەچی ژنان لە هەردوو باردا هەر قەلەندەرن؛ ئەو ژنەی کەسەکەی ناخیشی هەر ژنە ئەوە بێجگە لەوەی پیاوەک ژیانی دادەتەپێنی خۆشی خۆدژانە خۆی تەپەسەر دەکا، لێ ئەو ژنەی کەسەکەی ناخی پیاوە ئەوە هەر لە کوللەمەرگییەکی فرە سەختدا دەژی چونکێ دوو پیاو - ئەوەی ناخی و ئەوەی دەگەڵی دایە - وەک دوو بەرداش لە نێوان خۆیاندا دەیهاڕن! ژنی لەو بابەتانە ناتوانن تەنانەت وە ئەندێشەش دەگەڵ دڵخوازەکانی خۆیاندا بژین.. لە راستییدا جوایەزییەکی ئەوتۆیان نییە دەگەڵ ئەو ژنانەی کە ژیان و فەرهەنگی پیاو ناچاریان دەکەن ئاڵوودەی بەرنامە لەشفرۆشییەکان ببن یان لە (کارخانە - سۆزانییخانە)کان کار بکەن و بێ ئەوەی هیچ چێژ و چەشەیەک لە سێکسی خۆیان ببینن زۆر جار دوو پیاو یان پتر لە یەک کاتدا خەریکیان دەبن و وەک کاڵایەکی بێ بەها وەکاریان دەبەن!

هەرچەندە زۆربەی قسەکانی دروست بوون لێ لە بەرانبەر خۆم زۆر بەجێ نەدەهاتنە بەرچاوانم چونکێ ئەمن لە دەروونی خۆمدا عەوداڵبوونم وە ژنەکی دڵخوازی خۆم وێرانی کردبووم و ئەوەشم لە خۆم رادەبینی کە هەر ژنەک ببتە هاوسەری من دەتوانم لە هەموو چەوسانەوەیەکی داببڕم!

رۆژان هاتن و رۆژان رۆیین.. ساڵان هاتن و ساڵان رۆیین.. تا هاوڕێیەکی ژنم پەیدا کرد؛ ژنەک تا دەبێژی هۆشیار و نایاب.. هەستیشم دەکرد ئەمنی فرە خۆشگەرەک بی لێ نەمدەزانی ئایە پیاو لە نێو ناخی دایە یان ژن.. پاش ئەوەی هووردە هووردە پەیوەندییەکانمان قۆڵتر بوونەوە و پتر تێکەڵی یەک بووین زۆر جار باسی ئەو کێشەیەی دوو کەسایەتیی دەر و دەروونمان دەکرد.. رۆژەک هەر وە سەرپێی لێم پرسی:

- ئەوە کووە تا نهۆ هاوسەرت نییە؟ (وەک ئەوەی تووشی سەرسوڕمانەک بووبی هێندەک داما.. پاشان لەپڕ هاتە گۆ):

- با.. هاوسەرم هەیە! ئەمن پیاوەک لە ناخمدا هەیە.. ئێستا ئەو هاوسەرمە، نا.. ناخوازم بیکەمە دوو و لە بەدبەختیی خۆم ئەوەی دوومیش پیاوەک لە هندوڕیدا هەبی و ئیدی ببنە سێ و وە هەرسێکیان هەڵمبزڕێنن!!! نا نا.. هەر ئەو هاوسەرەم بەسە و نامەوێ وە دەستی خۆم کێشە و گرفتان لۆ خۆم پتر بکەم، لە راستییدا هەست دەکەم ئەو پیاوەی ناخی من بێجگە لەوەی زۆر وە توو دەچی لە تووش توندڕەوتر دیارە؛ وەک ئەوەی ئەمن دەیبینم چەند باشە کە ئەتوو دەستبەرداری ئەوێ - نیشتیمان - بووی.. ئاخەر ئەمن هەر دوونێ پێرێ وە پڕەپڕ لە بندەستی ئەو (ژنکوژ)انە قوتار بووم.. کەچی ئەو هاوسەرەم - شەوێدی کە خۆم لە جیهانی دەرێ دزییەوە و خزیمە نێو ناخی خۆم و لە باوەشیدا ئۆقرەم گرت - بێ هیچ پێشەکییەک و بێ ئەوەی وە هیچ شێوەیەک بارودۆخی من لەبەر چاوان بگری گۆتی:

(دەکرێ و دەشێ لەوێش - لە زێدە خۆشتڤییە سندانکوشتییەکەی خۆمان! - لە هزران رابچم و لەباتی (هەمووان!) بیربکەمەوە.. لێ هەگەر سەردڕ و سەربڕ و سەرکڕ و سەرسەریی نەبم و کتومت وەک بزنەکیویی نەژیم ئەوە:

یان دەبی لەو ستەمانە خۆش ببم کە دەرهەقم ئەنجامیان دا:

● یارۆیەکەم لەسەر ئەوەی رووخۆش و کراوە و خاکیی و تێکۆشەر بوو لە هەڵمەتی پاکتاوکردنی وە ناو (ژنە سۆزانییە بەعسییەکان!) وە بڕیاری کاروەدەستەکی بەدکار و دەستوەخوون دەستڕێژیان لێ کرد و وە سزای گەل و شۆڕشیان گەیاند! ئیدی خۆشم لە خەفەتان و لەوەی کە هیچم لە دەست نەدەهات هەموو نیشتیمانم وە جۆتە پڵاوەک دا و رێی پەڕاگەندەییم پێ کوتیەوە، هەر باش بوو لە رێیێ نەبوومە خۆراکی ماسی و نەهەنگان.. لێ تا گەیشتمە ئێرە قاچاغچییەکان شکۆمەندیی مرۆییمیان قرچوبڕ کرد.. لێرەش وەک دەیبینی لە کەناری ئارامی بندەستی عەزیایەکی فرە فرە گەرۆنەتردا دەژیم.. لێ هیچ نەبی هەگەر گۆشتیشم دەخۆا ناتوانی هێسکم بشکێنی!
● لەسەر هەڵنەواسینی وێنەی سەرۆک و رەخنەگرتنەکی سەرپێی لە سەرۆک و بنەماڵەکەی - تەنانەت رەخنەگرتنەکەشم پەخشانەکی ئەندێشەئامێز بوو - نەک هەر نەموێرا بچمەوە سەر کارەکەم بەڵکە وەک سەردەمی پێشمەرگایەتیی و کاری رێکخراوەیی سەردەمی بەعسییەکان وە ناچاریی پەنام بردە بەر (خۆ حەشاردان) چونکێ ئاسایش - هەیتەکانی سەرۆک و بەردەستەکانی - لەدووم بوون.. هەگەر وەبەر دەستیان بکەتبام نێو زارمیان پڕ گوللە دەکرد یان لە باشترین باردا خۆم لە (ئاکرێ - 'گوانتانامۆ''ی کوردستان) دەدیتەوە.. باش بوو هەر ئەوەندەیان لە دەست هات کە شاروەدەر و وڵاتوەدەرم بکەن و لۆ خۆم لێرە لە ئاوارەیی بیخولێنمەوە!
● تەنێ لەسەر ئەوەی کە (قولهووەڵا - سورەتی ئەلئیخلاس)م خووندەوە: ((بێژە: خوا تاک و تەنیایە {١} خوایەکی بێ نیاز {٢} هیچی لێ نەبووە و لە هیچیش نەبووە {٣} هیچ هاوکوف و هاوتایەکیشی نییە {٤})) و پاشان گۆتم: ''کەواتە هیچ''! ئیدی هەرچی تاریکبین هەبوون وە سەرمدا وەرین و هەر بابا بوو لە راستە خۆی دەیەویست ئەو (دۆزەخ!)ەی لە ئەنێشەیدا هەیە و لێی دەترسێ خۆی لێ دوور بخاتەوە و لۆ منی ساز بدا!
● ئیدی و ئیدی و... هتد.

یان دەبی:

وە شێوەیەکی کاتیی.. سەری خۆم شۆڕ بکەم و ملم دوو مەتر پان بی و دەست وە سینگەوە بگرم.. هەر کە گۆتیشیان ماست رەشە.. ئەوە ئەمنیش دەمودەست ببێژم: ''جا کەنگێ و لە چ جێ و سەردەمەک ماستی سپی هەبووە!؟ تشتی وەها عەنتیکە و سەیروسەمەرە هەرگیز ناشێ و نابی و ناکرێ''!!! ئیدی خۆم رادەستی هەلومەرجەکان بکەم و چاوەڕێ بم تا دەرفەتەکی لەبار دەڕەخسێ.

یان دەبی:

هەر ئێستا بژاردەی سێیەم پەسند بکەم کە ئەویش بەرانگژبوونەوەیە و دەبی هەردووکمان ئامادەی بەخشینی هەر تشتەک بین!).  

هەر کە لە قسەکانی پیاوەکەی نێو هندوڕی بۆوە.. ئەمن تەنێ ئەوەندەم گۆت: ''نا نا.. هیچ خەم مەخۆ خانم.. بەس ئەتوو رازیی بە.. مەرج بی ئەو پیاوەی نێو ناخت بەو ژنەی نێو ناخی خۆم تەمبێ دەکەم.. جا ئەو کاتە هەر خۆیان ناچار دەبن لە یەکمان مارە بکەن''! ئیدی قسەکەم وەک بەردی نێو دیوار جێی خۆی گرت و خۆبەخۆ هەرچی گرفت هەبوون لە پێشمان تەخت بوون و لە ماوەیەکی زۆر کەمدا وەک دوو هاوسەری زۆر ئاسوودە خۆمان لە ئامێزی یەکدی دیتەوە، وەلی ئەفسووس.. پاش کۆشانەکی زۆر هەردووکمان لەوە تێگەیشتین کە مرۆڤ وەک تاک هێشتا ئەوە نییە بتوانی دەگەڵ ناخی خۆی بحەوێتەوە.. جا درۆیەکی زۆر گەورەیە وەها پیشان بدا کە دەتوانی دەگەڵ کەسەکی دیکەدا بحەوێتەوە، لەبەرئەوە دەستبەرداری یەک بووین و دیسان هەر یەکەمان وە ناچاریی هاوسەرگیرییمان دەگەڵ ناخی خۆمان کردەوە!].

کانوونی دووەمی ٢٠١٥ - لەندەن
ماڵپه‌ڕی دارا خونچە