|
١٥\٤\٢٠١٤
گڕە سوار.
عەبدوڵا
سڵێمان(مەشخەڵ).
بۆ قابیل عادل و شاپوور
عەبدولقادری هاوڕێم کە بە دەستی غەدری ئیسلامی سیاسی لە شاری هەولێر لە
هەژدەی نیسانی ١٩٩٨دا تیرۆر کران.
چەخماخە و داگیرسا، وەک دەنگی برووسکەی یاخی
بوون لەوێڵا
ئەمجارە لەگەرمیان، لە دڵی کەرکووکی لەت لەتی نەوت لێ تکاو
لەپەلکی ژێر گڵی بلێسەی باوەنوور
لە خەمی ئاگرەکەی شۆراوا
پیادەڕێ.. سەرسینگی شۆڕیجە و ئازادی و
ئیسکانی بە هەنگاو گرێدا و
لەبەردەم تەپۆلکی گردەکەی تەپەیا، ڕامانێک ئیستێکی پێئەداو
دەم دەنێ بە کێلگەی برینی پشت کۆمی ڕەحیماوا
سوار پشتی گڕ بووە و ئەڕوانێ
بە خێڵی ئاوارەی کەرکووک و خانەقین ئەگەڕێ و
ڕەهێلەی بانگەواز دائەکا
سوار پشتی گڕ بووەو، بۆ ڕاستی ژیانی بێ ستەم بانگ ئەدا
ئەم گڕە.. لە گڕا بوو بە گڕ
لە خەما.. بوو بە تەم
بۆ هەتاو، تاریکی گرگن و بەستەڵەک ڕاو ئەنێ
لە ئازار ڕۆژانە گەرای ڕق، سەرسەختی، یاخی بوون دائەنێ
هەناسەی لە هەورە بڵندو بەرزەکان قەرز ئەکرد
لە قەوزەی عاتیفەی کارگەرو ئاوارە خۆی ون کرد
لە سێبەر هەنگاوا،پشووی کرد بە توێشوو
خەوی کرد بە خەون و
بێداری بەیەخەی وەنەوزا هەڵواسی
ئەم خەمە نەخەمی هیلاکی ڕوحی بوو و نە ترسی ئەناسی
ئەم زامە موچوڕکی ناوەتە بەرپێی و لەبەردەم ڕاچڵەکین
لە خەمی گێژاودا لافاوە
ئەم گڕە، ماڵ بە ماڵ ئەگەڕێ و خەمێکی ڕسکاوە
ئەم تەمە سۆراخی سەر سفرەی بەتاڵی ئاوارە و
ناو پارووی دزراوی بەیانی و نیوەڕۆ و شێوان بوو
لە بەردەم هێرشی زریانی ئەم کۆچە پڕ ئێشە
بانگەشەی هەرەسی پێدەشتی خەفەت و قەدپاڵی ئازاری کێوان بوو
گڕێکە و لە کوژان نەهاتوو
نێڵه‌ی وا لە دڵ و دەروونا دێتە دەر
ساڵ بە ساڵ بۆ ئایار سەد چەپکە گڕی تر دێتە بەر
ئەم شیعرەم زامێکە و سەری خۆی هەڵگرتووە
لە نێوان دژوار و ڕاستیا بێ ساتێک دوو دڵی ،سۆراخ و هانای خۆی بۆ
کرێکار بردووە
بێمەوە..گەر ئەمجار بێمەوە دەم دەنێم بە کانی ئەو زامەی بۆی ڕژای
سەر دەنێم بەشانی ئەو عەشقەی بۆ برژای
لە نێوان من و تۆ،کۆچێکی کتوپڕ کێلگەی دڵ ئەچێنێ
تۆفانێ لە خەم و دەریایێ لە ئازار ئەڕوێنێ
بووی بە گڕ، ئەوەتا دەبینم وا دیجلە هاواری ناوەتە ناو دڵی شەپۆڵی و
سیروانی لە ڕێگا هەڵکورماو،چەناگەی خۆی دەگرێ و
لە وردە برینی سەر سینگی جەلەولا و خانەقین ئەڕوانێ
گیرفانی نێو دڵی ماسییەکان ئەگەڕێ و
دەست دەکات بە ناخی ناو دڵی فوراتا و
لەولاوەش سەگوەڕێک بە کفری و کەلارم ئەوەڕێ.
تەماشا بە چاو و بە دڵ و بە نیگا دەبینم
نەسیمی سەر پەڕەی گوڵاڵەی پاڵ سەفین
وا خەندەی ناوەتە سەر پەڕەی شەونم و.
بە باڵی پەپوولەو بەسەر سەر مەعەسکەر سەلاما ئەیگێڕێ و
دێتەوە لەقەد پاڵ قەڵاکەی هەولێرا
دەبێتە بانگەواز.. نە چاوی لێک دەنی و نە دەنوێ
دەبینم بلوێری زامێکی ساوایە و
بە لێوی ئایاری ئەمساڵدا دەژەنرێ
لاوکی مەلۆتکەی خەمێکی جەرگبڕ
لە گوێ وە بۆ دڵ و لە وێوە بۆ ناخی دەروونمان دەتەنرێ
ئەوەتا پەنجەرەی نایلۆنی کون تێبووی ماڵێکی لەڕەگا پچڕێنراو
لەسەر ڕێی ئەم کۆچە کڕنۆشێ بۆ خوێنی ئاڵ دەبا
وا "زەنگی ئاوارە" لەسەر چۆک دانیشتووە و
لە گەردی خەمێکی زەرد باوا بە بێ دەنگ
بە چرپە کە بەلای بنکەدا ئەڕوانێ و
بە بۆنی تەنیایی و هاواری گەورەو مەنگ
فیشەکی فرمێسکی یاقووتی بەڕەنگی کاڵ ئەبا.
*
*
*
لە کۆچنامەی هیچ کۆچێکی لە ناوەختا خەم سەرچۆپی بەرنەداوە
هیچ بادەیەک بەبێ بزەو خەندەی عاشق هەڵنەدراوە
گوێزە بانەی هیچ ساڵێکم بێ قوربانی لای نەداوە.
هەژدەی چوارەو دونیا هێشتا سەراسیمە و خەم ئەبارێ
گەردەلوولێ بەرێوەیەو، وا بڕیارە ئەم بەهارە لە جیاتی گوڵ خۆڵ ببارێ.
هەژدەی چوارەو شار پێشوازی ئەیارێکی چنگ خوێناوی لەسەر ڕێیە
نیگای لەسەر ئاسۆ ناوەو دوو برینی بێ قەتماغەی تازەی پێیە
هەژدەی چوارەو خۆم ناوەتە نێو دەربەندی سەهۆڵ گڕی هەناسەتا
لە نێو تەمی خورپەخورپت، چەپکێ ئۆقرەم لەکاسەتا
هەژدەی چوارە و دوژمن چاوی بە هۆرەی عەشقت هەڵنایە
سەری دوپەلکی نێڵە و گڕ بەمەرگی تۆ دوایی نایە.
*
*
*
پرسەیە، یان دەنگی قەتاری لاوکەکەی شاپوورە
ئەستێرەی داگرتووەو تریفەی ناوەتە ژێر باڵی و ترۆیکی کردۆتە هێلانە؟
مەنزڵگای گردەکەی سەیوانە، یان دڵی هەزاران کارگەرە و ئاوارە
بۆ سەر خەوشکێنێ بووەتە جۆلانە؟
ژەهراوی ئەم کۆستە، وا مەززەی سەر مەستی ئەم
شەوە تارەیە
قولابی ناو گەرووی چاولێکنێی ئەژدیهای جواناوی ئەم ڕێگاو شارەیە
کۆچی تۆ ،بروسکەی تۆڵەی تۆی لە خاکی خەم شین کرد
دڵنیابە،ئەی گڕە سوارەکەی ئاوارەی گەرمیانم
سەفەری ئەمجارەت
دووژمنی ئازادی بۆ زبالە و بۆ ناخی زۆنگاو برد.
________________________________
چەند تێبینییەک:
١- ئەم شیعرە لە پرسەی ماتەمینی تیرۆری
هاوڕێیان شاپوور عەبدولقادر و قابیل عادل کە کۆمیتەی ڤانکۆڤەری حیزبی
کۆمۆنیستی کرێکاری عێراق لە شاری ڤانکۆڤەر لە ٢٥\٤\١٩٩٨
سازیدا، لەلایەن شاعیرەوە خوێنرایەوە.
٢- زەنگی ئاوارە : ڕۆژنامە و زمانحاڵی
کۆمەڵەی ئاوارەکانی کوردستان بوو کە هاوڕێیان قابیل و شاپوور و چەند
کەسێکی تر سەرپەرشتیان دەکرد و لەشاری هەولێر لە نیوەی یەکەمی دەیەی
نەوەدەکانی سەدەی ڕابردوو چاپ و بڵاو دەکرایەوە.
٣- ئەمساڵ ٢٠١٤
لەئاستی چەند وشەیەک لەپێناو تەکنیکی شیعرەکەدا، دەستکاری شیعرەکەم
کردووە.
ماڵپه‌ڕی عه‌بدوڵا
سڵێمان(مه‌شخه‌ڵ)
|
